ONLAYN BAYRAM ILAJÍ SHÓLKEMLESTIRILDI

Ǵárezsizlik bayramın ayrıqsha uran astında belgilew dástúrge aylanıp qaldı. Uranlar ádette pútkil jámiyetti, sociallıq pikirdi, puqaralardı birden-bir maqset jolında birlestirgen hám jańa tabıslarǵa baǵdarlay alǵanda ǵana haqıyqıy kúshke aylanıwı múmkin. Usı mánide alıp qaraǵanda hár qanday uran millettiń mápine sáykes keliwi kerek.

Húrmetli Prezidentimiz Shavkat Mirziyoev tárepinen mámleketimiz ǵárezsizliginiń jigirma toǵız jıllıq bayramın “Sen – qúdiret dáregi, baxıt mákanı, janajan Ózbekstanım!” degen iygilikli ideyanı ózinde jámlegen uran astında belgilew usınıs etildi. Álbette, bul uran hár bir ózbekstanlını ruwxlandıra aladı. Házirgi waqıtta da, usı uran mámleketimizdiń búgingi kúndegi jaǵdayına da say ráwishte qoyılǵanlıǵın sezemiz.

El basshımız belgilegeni sıyaqlı, mámleketimiz hám xalqımız usı jıldıń basında óz aldına úlken maqsetler qoyǵan edi. Biraq, dúnьyaǵa tarqalǵan koronavirus infekciyası mart ayında jurtımızǵa kirip kelgeni, keyinirek Buxara wálayatındaǵı qattı samal, suw saqlaǵıshtaǵı suw tasqını sebepli barlıq jobalarımız ózgerip ketti. Búgin tajlı virus Ózbekstan xalqın qıyın sınaqtan ótkerip atır. Bir nárseni ayrıqsha atap ótiw kerek, bul qıyınshılıqlar aldında xalqımız albırap qalmadı. Kerisinshe, xalqımız áne sonday salmaqlı qıyınshılıqlar dáwirinde mártlik, tatıwlıq hám birliktiń shın mánistegi úlgisin kórsetpekte.

Usı jıldıń 2-sentyabrь kúni barlıq joqarı oqıw orınlarınıń joqarı kurs studentleri ushın jańa oqıw jılı baslandı. Nawayı mámleketlik kánshilik institutı Nókis filialı jámááti de jańa oqıw jılın kóterińki ruwxta baslap jiberdi.

Filialda Zoom baǵdarlaması arqalı “Sen – qúdiret dáregi, baxıt mákanı, janajan Ózbekstanım!” atamasında onlayn tárizinde ótkerilgen bayram ilajın filial direktorı F.Xudoyberdiev ashıp berdi hám bayram menen qutlıqladı.

Bunnan soń, filial professor-oqıtıwshıları jańa oqıw jılınıń baslanıwı menen student-jaslarǵa tabıslar tiledi hám filialdıń эlektron oqıw platforması arqalı sabaqlarǵa belsene qatnasıwǵa shaqırıp qaldı. Óz gezeginde student-jaslar da onlayn tárizinde watan, Ǵárezsizlik tuyǵıların maqtanısh etetuǵın qosıqlardan oqıp berdi.

Bayram ilajı “Ǵárezsizlik sabaq”ları menen dawam etti…

NMKI Nókis filialı Baspasóz xızmeti.