MÁNGI YADIMIZDASIZ

Kimdur tariyxiy orinlarǵa sayaxat etiwdi, kimdur ele insan adimi jetpegen jerlerge bariwdi, jáne kimlerdur rawajlanǵan mámleketlerge sayaxat etiwdi qáleydi. Bunin’ barliǵi, álbette, insannin’ ruwxiy du’nyasinan kelip shiǵip sheshim qabillaydi.

Al, biz bolsaq, Nawayi mámleketlik kánshilik instituti Nókis filiali professor-oqitiwshilari hám de student-jaslari Nókis qalamizdaǵi “Hásiretli ana” hám Allayar Dosnazarov esteligine bariwdi maqul kórdik.

«Mángi yadimizdasiz» atamasindaǵi bul ziyaratqa «Tábiyǵiy hám uliwma kásiplik pánler” kafedrasi basliǵi K.Djaksimuratov hám topar basshisi Q.Uzaqovalar basshiliǵinda filialimizdin’ kánshilik isi topari student-jaslari menen birgelikte ziyarat ettik.

Bul sayaxattan maqset, ruwxiy dem alis hám estelik haqqinda toliq maǵluwmatqa iye boliw hám jaqinnan tanisiw boldi. Biz bul jerde  urista ju’rgen perzentin elege shekem  ku’tip otirǵan hásiretli ana mu’sinin kórdik. Onin’ kózlerindegi qayǵi, perzent saǵinishi onin’ mun’li ju’zinde sáwlelengendey kórindi. Biz jáne de uris dáwirlerinde qaza bolǵan jerleslerimizdin’ atlari altin háripler menen oyip jazilǵan kitaplarin kórdik.

Men bul ata-babalarimizdin’ atlarin oqip otirip, olardin’ biykarǵa jan bermegenligin, usi tinish zamanimizdin’ tiykarshilari ekenligin birme-bir oyimnan ótkerdim. Biz usinday márt hám batir ata-babalarimiz menen hámiyshe maqtanish etemiz hám olardin’ mártliklerin yadimizda saqlaymiz.

Biz jáne de Allayar Dosnazarov esteligin ziyarat ettik. Biz bul insan menen jaqinnan tanispiz. Onin’ mártligi, ádilligi, óz xalqina bolǵan su’yispenshiligi  hám qayirqomliǵin biz jaslar ózlerimizge u’lgi sipatinda alamiz.

Álbette, filialimizdin’ professor-oqitiwshilari tárepinen shólkemlestirilip barilatuǵin bunday ilaj biz student-jaslarǵa ruwqiy-mádeniy zawiq baǵishlaydi.

Mehriban Rametullayeva,

Nawayi mámleketlik kánshilik instituti Nókis filiali kánshilik isi topari studenti.