КОРРУПЦИЯ ҲӘМ ОҒАН ҚАРСЫ ГҮРЕСИЎ

Соңғы жыллары мәмлекетимизде коррупцияға қарсы гүресиў тараўында әҳмийетли шөлкемлестириў-ҳуқықый реформалар әмелге асырылды. Халықтың ҳуқықый санасын ҳәм ҳуқықый мәдениятын арттырыўға, жәмийетте коррупцияға қарсы гүресиўди қәлиплестириўге қаратылған системалы илажлар көрилмекте.

Сонлықтан да, Өзбекстан Республикасы 2003-жыл 13-октябрь күни Бирлескен Миллетлер Шөлкеми тәрепинен қабыл етилген «Коррупцияға қарсы гүрес» конвенциясын 2008-жылы ратификациялады. Сондай-ақ, 2017-жылы 4-январь күни Президентимиз тәрепинен «Коррупцияға қарсы гүрес ҳаққында»ғы Нызамы қабыл етилди.

Соны айрықша атап өтиўимиз керек, ҳүрметли Президентимиз тәрепинен 2019-жылдың 27-май күни қабыл етилген «Өзбекстан Республикасында коррупцияға қарсы гүресиў системасын буннан былай да жетилистириў илажлары ҳаққында»ғы Пәрманы коррупцияға қарсы гүресиў системасының нәтийжелилигин арттырыў бағдарында жаңа қәдем болды.

Бул Пәрман менен «2019-2020-жылларда коррупцияға қарсы гүресиў мәмлекетлик бағдарламасы» ҳәм «Коррупцияға қарсы гүресиў бойынша республикалық уйымлараралық комиссиясы»ның жаңаланған қурамы тастыйықланды. Мине, усы Пәрманнан келип шыққан ҳалда, мәмлекетимизде коррупцияға қарсы гүресиўди жетилистириў мақсетинде елимиздиң қурылыс ҳәм билимлендириў тараўларында «коррупциясыз тараў» жойбары әмелге асырылмақта.

Усы жылдың 11-декабрь күни Наўайы мәмлекетлик кәншилик институты Нөкис филиалында филиал профессор-оқытыўшылары ҳәм студент-жаслары арасында «9-декабрь – дүньяжүзлик коррупцияға қарсы гүресиў күни» мүнәсибети менен бир қатар мәмлекетлик уйым ҳәм шөлкемлер, жәмийетлик шөлкемлер менен биргеликте «Коррупция ҳәм оған қарсы гүресиў» атамасында илаж шөлкемлестирилди.

Илажды филиалдың Оқыў ҳәм тәрбиялық ислери бойынша директор орынбасары Д.Жумамуратов басқарып барды.

Онда Өзбекстан Республикасы Бас прокуратурасы жанындағы экономикалық жынаятларға қарсы гүресиў департаменти Қарақалпақстан Республикасы басқармасы қәнигеси Р.Садыков, Ал-Беруний атындағы орта арнаўлы ислам билим журты окытыўшысы Ж.Искендеров, Нөкис қаласы 4-санлы Ишки ислер бөлими профилактика инспекторы, аға лейтенант А.Асенбаевлар шығып сөйлеп, коррупция жәмийеттиң раўажланыўына кери тәсир етип қоймастан, елимиздеги ҳәрекет етип турған нызамларға исенимсизлик және оларға ҳүрметсизлик руўхын пайда ететуғынлығы ҳаққында атап өтти.

НМКИ Нөкис филиалы Баспасөз хызмети.