ИТИБАРСЫЗЛЫҚҚА ЖОЛ ҚОЙМАЙЫҚ

Нөкис қаласы Айрықша жағдайлар бөлими тәрепинен ис-илажлар ислеп шығылып, қала аймағында жайласқан мәкеме, кәрханаларда, оқыў орынлары, мектепке шекемги билимлендириў мәкемелеринде ҳәм пуқаралар турақ жайларында ийис газинен зәҳәрлениўдиң, пайда болыўы мүмкин болған айрықша жағдайлардың, өртлердиң алдын алыў бойынша бир қанша жумыслар әмелге асырылыўы жолға қойылды.

Атап айтқанда, пуқаралардың турақ жай ҳәм мал-мүлклерин  өртлерден қорғаў мақсетинде мәкеме-шөлкем ҳәм де өзин-өзи басқарыў уйымларында үгит-нәсият илажлары өткерилмекте.

Усындай илажлардың бири усы жылдың 1-декабрь күни Наўайы мәмлекетлик кәншилик институты Нөкис филиалында болып өтти. Онда Нөкис қаласы АЖБ 1-Өрттен қутқарыў бөлими смена баслығы, капитан Қ.Идрейсов, филиалдың Жаслар менен ислесиў, руўхыйлық ҳәм ағартыўшылық бөлими баслығы Н.Қыдырниязов, Тәлим сапасын қадағалаў бөлими баслығы С.Тлеумуратов ҳәм басқалар шығып сөйлеп, студент-жасларға кең түрде түсиниклер берип өтти.

Түсиник жумысларын  өткериўден гөзленген тийкарғы мақсет — өрт ақыбетинде инсанлардың денесинде күйик жарақатларын болдырмаў, ең ашынарлысы өрт ақыбетинде ийис газинен зәҳәрлениўдиң алдын алыў болып табылады.

НМКИ Нөкис филиалы Баспасөз хызмети.