ИЙИС ГАЗИНЕН САҚЛАНАЙЫҚ

Ҳәр жылы қыс мәўсими басланыўы менен өрт қәўипсизлиги қағыйдаларына муўапық жылытыў тармақларынан пайдаланбаған тутыныўшылар арасында, ийис газинен жәбир көриўшилер ушырасып турады.

Усындай кеўилсиз жағдайлардың алдын алыў бойынша тараў қәнигелериниң қатнасында түрли түсиндириў илажлары алып барылмақта.

Бүгин Наўайы мәмлекетлик кәншилик институты Нөкис филиалы имараты алдында Қарақалпақстан Республикасы Айрықша жағдайлар басқармасы тәрепинен көргизбели оқыў-шынығыў илажлары алып барылды.

Илажда Қарақалпақстан Республикасы Айрықша жағдайлар басқармасы баслығы орынбасары, подполковник М.Сейдуллаев, филиал директоры Ф.Худойбердиев ҳәм басқалар филиал студент-жасларына гүзги-қысқы мәўсимде жылытыў үскенелеринен дурыс пайдаланыў кереклигин, ҳәр қандай газ насазлықлары жүз берсе дәрҳал «101», «1050» телефон номерлерине қоңыраў етип хабардар етиў бойынша түсиниклер берип өтти.

Ҳақыйқатында да, жоқарыда атап өткенимиздей, қыс мәўсиминде тәбийғый газге болған мүтәжлик ҳәр қашанғыдан да жоқары болады. Усындай пайытларда, ең дәслеп тәбийғый газден қәўипсиз ҳәм ақылға уғрас пайдаланыўға итибарды күшейтиў талап етиледи. Сонлықтанда, билимлендириў мәкемелеринде, кәрхана, мәкан ҳәм аўыл пуқаралар жыйынлары турғынлары арасында ийис  газинен зәҳәрлениў, газ-ҳаўа араласпасынан келип шығатуғын   бахытсыз ҳәдийселердиң алдын алыў бойынша үгит-нәсият, түсиндириў жумыслары турақлы алып барылғанда ғана, нәтийжеге ерисемиз.

НМКИ Нөкис филиалы Баспасөз хызмети.