Жоқары билимлендириў тараўындағы бир мәртелик өзгеше тәртиплердиӊ енгизилиўи студент жаслардыӊ билим алыўы ушын жеӊиллик ҳәм имканиятлар жаратпақта

Мәмлекетимизде билимлендириў тараўында әмелге асырылып атырған реформалардыӊ нәтийжесинде елимиз жасларыныӊ жоқары оқыў орынларында билим алыўын даўам еттириўи ушын үлкен мүмкиншиликлер пайда етпекте. Хабарыӊыз бар, усы жылдыӊ февраль айында Өзбекстан Республикасы билимлендириў мекемелерине оқыўға қабыл етиў бойынша Мәмлекетлик комиссия мәжилисиниӊ баяны тийкарында 2019/2020 оқыў жылында қоӊсы мәмлекетлердеги жоқары оқыў орынларында билим алып атырған пуқараларымыздыӊ оқыўларын республикамыздыӊ жоқары оқыў орынларына көшириў ушын ҳүжжетлер қабыл етилип, олардыӊ белгиленген талапларға жуўап беретуғынлары бойынша унамлы шешимге келинген еди. Бүгинги күнде республикамызда ҳәм қоӊсы мәмлекетлердеги коронавирус пандемиясы мүнәсебети менен белгиленген карантин қағыйдалары жағдайларын инабатқа алып, усы пуқаралардыӊ оқыўын республика жоқары оқыў орынларына көшириўине төмендеги талаплар бойынша рухсат бериледи:

пуқаралардыӊ паспортларында белгили бир қоӊсы мәмлекетке оқыў дәўирине сәйкес мүддетте кириў-шығыў белгилериниӊ бар екенлиги;

қоӊсы мәмлекетлердеги жоқары оқыў орынларында студент ҳақыйқатында да оқығанлығы ҳаққындағы ҳүжжетлериниӊ түп нусқалары усынылыўы;

қоӊсы мәмлекетлердеги белгили бир жоқары оқыў орныныӊ мәмлекетлик аккредитациядан өткенлиги.

Өз гезегинде жоқарыдағы талаплардыӊ орынланбаўы усы пуқараларға республика жоқары оқыў орынларына оқыўы көширилиўине рухсат етилмейди.

Усы пуқараларды студентликке қабыл етилгенлиги ҳаққындағы ҳүжжетлерди рәсмийлестириў бул бойынша белгиленген айрықша тәртипте төмендегише әмелге асырылады:

жоқары оқыў орны басшысыныӊ көширилип атырған пуқараларды сабақларға қатнасыўға рухсат бериў ҳаққындағы ҳүжжетлерине муўапық оларға төлем-шәртнама қаржыларын төлеўге рухсат етиў, бунда, төлем-шәртнамасында пуқараныӊ тийисли ҳүжжетлери белгиленген тәртипте усынылмаған жағдайда шәртнама бийкар етиледи;

карантин шеклеўлери жуўмақланғаннан кейин қоӊсы мәмлекетлердеги жоқары оқыў орынларынан пуқараныӊ тийисли ҳүжжетлери республикамыз жоқары оқыў орынларына белгиленген талаплар дәрежесинде усынылғаннан соӊ ҳәмде оныӊ менен дүзилген төлем-шәртнама қаржылары төленгеннен кейин пуқараны студентликке қабыл етилген деп есаплаў ҳаққында жоқары оқыў орны басшысыныӊ буйрығы рәсмийлестириледи.   

Яғный, сол ўақытта усы жыл февраль айында әдеттегиден өзгеше тәртипке муўапық басланған оқыўды көшириў процеси жуўмақланады.

Келеси оқыў жылларында, сол қатары 2020/2021 оқыў жылында республика жоқары оқыў орынларына студентлер окыўын көширип, қайта тиклеў процесси Өзбекстан Республикасы Министрлер Кабинетиниӊ 2017-жыл 23-июньдеги 393-санлы қарарында белгиленген тәртипке муўапық әмелге асырылады.

Буннан тысқары, 2020/2021 оқыў жылында барлық мәмлекетлик жоқары оқыў орынларыныӊ бакалавриат ҳәм магистратурасында күндизги билимлендириў формасында төлем-контракт тийкарында оқыйтуғын барлық студентлерге шәртнама шәртлерин орынлаўда әмелдеги базалық төлем-контракт муғдарыныӊ стипендиясыз бөлегине 10 пайызлық шегирме берилген. Бунда әлбетте пандемия шәраятында халықтыӊ төлеў қәбилиети пәсейиўи жағдайы инабатқа алынып, перзенти төлем-шәртнама тийкарында оқыйтуғын шаӊарақларға жеӊиллик жаратыў ҳәм оларды қоллап-қуўатлаў мақсети көзленген.

Наўайы мәмлекетлик кәншилик институтыныӊ
Нөкис филиалы юрисконсульти
Аметова Зухра Кыркбаевна